Channel 3 Tapas Bar & Restaurant

Open Now

Now Closed

同FD想揾間酒吧慶祝下，佢推薦咗哩間西班牙酒吧，咁試試啦。酒吧裝修得唔錯，環境都唔算嘈，OK。坐低會送上餐前小食Nachos，係粟米片，搭配埋沙律醬，送酒唔錯，仲可以無限refill添。Cinderella，幾好睇啲一杯mocktail，飲落橙汁味好重同埋好清爽，唔錯。熱拿鐵，咖啡味好香濃，好飲。香煎和牛舌配番茄莎莎，牛舌煎得好香口，簡單落咗少少調味已經好夠味，搭配埋番茄莎莎一齊食，一流。即刨帕爾馬火腿配香脆多士，估唔到哩份火腿都幾大一份，多士焗到脆啵啵，仲搭配埋醃制橄欖，簡直係送酒最佳搭配。西班牙小食拼盤，有辣肉腸，忌廉芝士煙三文魚波，黑松露醬薯條同招牌炸雞翼。辣肉腸都幾多下，同蒜片一齊炒，好惹味，仲搭配埋沙律醬，食落又係另一種風味。忌廉芝士煙三文魚波, 煙三文魚包裹住芝士，食落好特別。雞翼炸到脆啵啵，裡面仲好juice。薯條真係好香口，全部食曬。簡單幾份小食，搭配埋啲嘢飲，已經好足夠，再同FD吹下水，真係好chill！