傷心酸辣粉 (西洋菜南街) (Closed)

好耐冇食過傷心酸辣粉啦，咁啱今日行咗全日就想搵個位坐低。想起附近有間傷心酸辣粉，而且下午茶時間做到六點，咁就入去啦。嗌咗口水雞酸辣粉配凍奶茶～口水雞份量都多，而且係好厚嘅雞胸肉。口水汁好食，小鹹少麻辣，好岩我口味。只係雞皮厚左少少......相反酸辣粉就好失望，雖然已經叫咗中辣，但係又唔辣又唔酸麵質偏腍偏軟，最重要係辣汁完全入唔到去薯粉入面，湯底好似清湯加紅油咁，極度失望。唯一可取之處係佢嘅花生好熱辣辣剛剛烤焗過，十分脆口。奶茶叫咗少冰，但係都係有半杯冰。碎冰好快就溶搞到啲奶同茶好快變得好浠，一啲都唔好飲。