慶發飯店

Open Now

Now Closed

慶發飯店我已經幫襯左好多年，金生最鍾意呢度嘅排骨飯，早前曾經因為加租已被迫光榮結業，知道要結業後有點失樂，後來過左大約年零，佢又揾到新舖重操故業，從此我地又多返一個飲茶好去處，無論下晏或夜晚，想食就去食。今晚放學後又嚟到呢度飲夜茶，特別鍾意呢度夠快靚正，除左咖哩魷魚同牛柏葉係要即蒸外，好多點心都係即叫即有，呢度人流轉得幾快，佢會每樣點心蒸少少出嚟賣，所以唔駛擔心蒸過火而太淋太爛。呢度價錢算係咁啦，點心最平$13一款，最貴都係即叫即蒸嘅魷魚同牛栢葉$20，而盅頭飯都係$19/$20一個，茶錢$3，無加一，嘆返一盅兩件都唔駛$30，香港罕見，真係造福唔少市民。豉汁排骨飯係金生最愛，佢喺度食左10幾年，佢話由$12食到而家$19。只因喜歡佢嘅排骨骨肉均稱，唔肥唔瘦，又夠淋夠滑，啲飯蒸得岩岩好，香軟潤滑又粒粒分明，食前落一湯匙豉油就perfect。之前只會食豉汁排骨飯，所以今次都係第一次叫北菇滑雞飯，雞肉又係好香滑，飯裡隱約滲出北菇嘅香味，同排骨飯不相伯仲，簡簡單單嘅盅頭飯已經覺得好滿足。唔知點解硬係喜歡食呢度嘅咖哩魷魚，懷念呢種舊式酒樓先有嘅咖哩味道，即叫即蒸嘅魷魚，大大件但又夠爽口，好有口