火車頭越南餐室 (浣紗街)

Open Now

Now Closed

又雨又寒的下午，於附近急需快速解決趕往工作，見此店毀譽參半，本來無打算以身試伏。偏偏架車泊了在她門外，帶著”女人每月虛一次”的疲弱身軀，不想淋雨再行走，本著好又一餐，唔好就一陣再食多餐的心態，賭一舖吧。首先要讚的是，侍應服務不錯，介紹了跟餐沙律的材料(加$15)，見到午餐menu一道”勁薑豬潤牛肉湯河”, 眼前一亮，就如令妃娘娘所說”—-這正是本宮現在最需要的”加埋個沙律同薑茶，這場賭局準備開彩了！薑茶普通即沖貨色，沙律先上，材料豐富，雞絲生菜海哲柚子仲有大樹菠蘿，調味酸度適中，份量仲好大碗，雖則生冷嘢現刻應少吃，但有薑湯同薑茶加持下，清哂！侍應仲問定要不要芽菜，然後連同青檸辣椒一起奉上。檯上有大棵金不換及生菜自助。至於主角湯河，先呷一口湯—“喂，掂喎!”湯清卻牛肉味濃，唔過咸，無咩師傅味，無我最憎的洋蔥，薑絲多，薑味足。落埋配料，香酸醒胃，豬潤剛熟滑溜，牛肉多牛味啖啖肉，點落跟埋的辣醬同油膏。呢碗嘢，開胃，驅寒，暖身，補血。。。。直頭係女士恩物呀！淨係為左呢碗湯河，我會再番啅！