池家人煲仔飯

Open Now

Now Closed

一個星期內我兩度嚟深水埗這間「池家人煲仔飯專門店」，可見佢哋嘅出品有啲吸引力。首次幫襯喺閒日下午九唔搭八時段，內有唔少空位，單人匹馬唔駛排隊直入，食咗個水準極高嘅臘味煲仔飯，料有切開成片狀嘅臘腸、膶腸、臘肉同一小舊臘鴨，份量唔多唔少但收$58算合理，而且飯粒粒分明夠油香，飯焦呈塊狀恰到好處。第二次周五晚去到就人山人海，同朋友二人就排咗近一粒鐘先入到座，然後order後亦等咗25至30分鐘先食到煲仔飯。呢晚食咗$88嘅黃鱔煲仔飯，黃鱔用香港常見粗大嗰種，同台山黃鱔飯用的幼身兼去咗骨嘅黃鱔唔同。鱔肉質地緊緻且味道唔錯，但就要識吐骨頭，至於豆豉等調味OK，唔會太鹹。不過，呢度嘅黃鱔飯冇落葱，顏色同香味差咗啲，飯焦亦冇乜。這或許同魚類煲仔飯不宜焗太耐有關，睇嚟想食多飯焦嘅煲仔飯，都係要選臘味排骨類多油分又襟煲嘅配料好啲。總體而言呢間店嘅煲仔飯係好食嘅，但就要避免喺晚飯黃金時段嚟。看店名英文寫hotpot rice，想笑，因為我唔係想食打邊爐，正確煲仔飯嘅英文應該喺claypot rice囉😌。