喜膳燒

Open Now

Now Closed

秋高氣爽最適宜去郊外BBQ，奈何疫情未穩仍要等等，此刻去食下串燒止下癮都好。此店主打串燒，有各類酒供應，店仔細細小酒吧裝潢，chill下食下亦不錯，價錢合理，串燒多選擇樣樣吸引，一食甚有驚喜。明太子燒雞翼兩隻 $48香口雞翼釀左明太子，少少辣調味唔錯，雞翼脹卜卜咬落大啖肉都幾滿足。燒車厘茄煙肉卷 $29咸脆味香嘅煙肉捲住一咬爆汁甜美嘅車厘茄，簡單配搭係我必食。燒煙肉鵪鶉蛋3粒 $32煙肉咸味更提升鵪鶉蛋香，外脆煙肉夾埋蛋白彈牙口感，這樣配搭的確有驚喜。海鹽燒皇牌牛舌 $49牛舌薄薄三片，軟腍爽彈口感，加左海鹽惹味。芝士響鈴 $21外皮燒得勁脆有豆香，加上半溶芝士口感極佳有層次，正！孜然燒韮菜 $19韮菜大注頗長，撒滿孜然粉芳香味濃惹味非常。燒珍寶大扇貝(蒜蓉) $68扇貝大隻無欺場，貝肉肥厚新鮮彈牙，被滿滿的蒜蓉和索晒汁的粉絲掩蓋，一人一隻幸福來了。照燒汁燒京葱 $16爽口京葱塗左薄薄燒汁，甜美清香好味。燒蒜蓉茄子仔 $28茄子肉嫩入口即融，滿滿蒜蓉香口美味，份量剛好食完不覺膩。燒玉桂焦糖金菠蘿 $34菠蘿清甜多汁無渣，加埋脆薄焦糖美味，精彩甜品為今晚的串燒巡禮劃上完美句號。