盛記酒家

Open Now

Now Closed

老公之前同舊同事食飯，讚呢度無論環境嘢食都好有以前細個舊式酒樓既特色，d碗碟係舊式，即係公雞或鯉魚嗰種，感受到舖頭好用心咁去做。今日專登再同我嚟食。荔枝蜜叉燒皇$168經理介紹燒味好味，我哋點了碟，好大碟，性價比高，每塊都厚而且少少燶邊，不會太肥，食落唔硬，好軟熟好嫩，蜜汁味真係非常香甜，味道冇得頂。錦江海鮮豆腐煲用料豐富，海鮮包括厚切班塊、鮮魷、珊瑚蚌同蝦，食得出唔係冰鮮既。豆腐用了布包豆腐，炸得外層脆口，內裏嫩滑，醬汁微辣，好惹味，送飯或淨食都正。揚州炒飯配料豐富，大量蝦仁，叉燒，菜心粒，用了靚。炒飯夠鑊氣唔油，大大碟，好滿足。呢餐非常滿足。茶、小食烚花生同贈送嘅甜品芋頭紫米露都係高質素。