叁淥火鍋 (Closed)

見你哋個 fb 講到咁吸引，於是今日特登入元朗去試食。😋呢間主打食四川嘢嘅火鍋店，地方夠大，座位夠闊，冷氣夠足，就算食到㷫合合都唔會覺得熱。講返啲嘢食先！今次嚟係試佢嘅午巿火鍋，$68 + $28 轉沙嗲湯底 + $2 轉凍飲，杯凍檸水超大杯，好抵呀！湯底：沙嗲麻醬湯，唔鹹，好香濃嘅沙嗲味，有丁丁咁多辣，仲有 4 大舊好滑嘅豆腐。😍美國安格斯牛頸脊有 4 片，厚切，肉味濃郁，軟腍冇渣。（晚巿一碟要 $98 架！唔係 cheap cheap 肥牛呀！）手工韮菜豬肉餃子有 2 隻，韮菜香濃，豬肉餡有咬口又多汁，餃子皮夠彈牙。墨魚丸 1 粒，同食開嘅唔同味，都好味。魚蛋 1 粒，超濃魚味，又彈牙。貢丸 1 粒，都好食，不過襯沙嗲湯底就鹹咗少少。雞髀菇數件、鮮冬菇 2 隻，正常味。生菜、娃娃菜，都正常。壽桃牌火鍋麵，未試過就試下，麵質好似公仔麵，撈埋啲沙嗲湯底，正到冇朋友！😍😍😍凍檸水走甜，用隻啤酒杯裝到滿瀉咁滯，超勁大杯，呢 $2 加得好抵！行到熱辣辣，飲返幾啖即刻暑氣全消！🤩仲有仲有，呢度嘅侍應個個服務態度都好好，有禮又體貼，不錯！