新漢記飯店 (Moved) New Location

晏晝係沙田食到把幾火，夜晚就諗住同阿媽同女友去食o的好野，阿媽話不如去粉嶺新漢記，話之前去過，o的野好好味（我都食過佢打包果o的，真係幾好味）。點知我阿媽叫埋auntie A同auntie B去，結果就產生左一個好奇怪既飯局組合。七點去到，好彩auntie A同事頭婆熟，唔駛等位，出面個個排晒隊，我地行入去就有位，不過就窄O的，個四人檯坐五個人，得我一個男仔，焗住我要坐圓凳。講返野食先，auntie A話佢請，仲係咁叫送，先後叫左炒魚麵、半隻走地雞、一條蒸倉魚、四隻聖子、一碟南乳大蝦、炸豆腐、客家粉絲、豬油撈飯、仲有個肉碎湯之類既送，每味送簡簡單單，但係味道真係唔錯，我最鍾意條蒸魚，真係好新鮮好滑，個客家粉絲（auntie A叫既，個送叫咩名真係唔知啦）有O的好似粉絲湯既野，仲有肉碎、咸菜、蜆肉同少少辣椒，好惹味。個炸豆腐更係普通得來見功架，外面薄薄地一層好脆，入面軟滑又唔油膩，真係必食！！！