第一家 (Closed)

最近西灣河新開咗呢間叫第一家嘅韓式餐廳，佢哋用戶戶送點外賣仲有折添，所以專登叫咗佢哋嘅二人餐外賣試吓。佢哋嘅套餐有一款嘅炸雞，兩款嘅主食。我哋呢次就揀咗無骨蜂蜜蒜香炸雞、芝士辣海鮮炒年糕、韓式炒粉絲。無骨蜂蜜蒜香炸雞：呢度嘅炸雞嘅炸衣夠哂薄脆不帶油，咬開見到細嫩嘅雞肉，仲有肉汁滴緊出嚟添。而且我哋叫咗佢哋嘅蜂蜜蒜香，蒜味突出，令炸雞味道更豐富，蜂蜜嘅清甜清香有效令炸雞嘅油膩感銳減，可以食多幾舊都唔怕。芝士辣海鮮炒年糕：首先芝士份量勁多，表面係厚厚嘅一層芝士，仍然可以做到拉絲效果，佢哋嘅醬汁辣得嚟夠哂惹味，加埋芝士同埋年糕一齊食就最啱。最後佢哋嘅海鮮都幾多幾新鮮，食落無雪味，口感都好彈牙爽口。韓式炒粉絲：前兩樣都較為熱氣，所以叫咗個炒粉絲作平衡。但呢個粉絲都好好味，令人一食上癮。佢嘅調味得宜，炒得夠乾身，唔會食到成口油同埋粉絲唔會炒到痴埋一舊舊咁，令人好滿意嘅粉絲，仲有佢嘅份量好多，兩個女仔都完全夠食。