月喬正宗越南湯粉 (柏樹街)

Open Now

Now Closed

朋友仔放假， 約咗一齊食下午茶， 佢帶我去佢公司附近食越南粉 ，佢話好食又抵食。兩個人每人叫咗一大碗粉， 兩個小食，兩杯嘢飲 ，坐低慢慢傾 。下午茶時間人唔少 ，大家都係揀呢啲時間呢食越南粉，貪佢清爽健康又好味。 餐廳不算大，但係乾淨企里， 斯文有禮嘅店員靚女姐姐熱情招呼我哋，提我地用 qrcode 點餐。 我叫左碗牛展牛腩湯河，好大一碗， 牛展牛腩都煲得好淋，有好多芽菜香葉洋蔥，加埋舊青檸， 清新美味，好快食完一大碗。仲有兩個小食 ，炸蝦餅金黃色 ，點甜辣醬食。 另一個小食係米紙卷，整得晶瑩通透，入面啲青瓜芽菜爽脆，扎肉鮮香，米紙卷啲皮係依依銀銀， 浸喺啲魚露糖醋汁 入面 ，酸酸甜甜好開胃。 兩個雖然話係小食 ，其實嗰份量都唔少， 我哋每人食完一大碗粉 ，再加兩個小食，飲埋我哋啲特色飲品 ，食到攬住個肚，我諗晚飯要好夜食先食得落啦。