百味堂 (Closed)

因為見到Facebook報導話百味堂喺希慎開pop up store，作為銅鑼灣扮工一族嘅我，食完lunch梗係同飯腳們去試試，點半左右去到，唔洗排隊太好啦。原先想叫黑牛試試，但唔知點解無，於是叫左銅鑼灣限定嘅阿薩姆奶茶雪糕，飯腳就叫左朱古力牛奶雪糕，等左幾分鐘就有得食，從透明杯身見到係幾靚嘅，一層雪糕一層奶茶，屎屎型雪糕面用檸檬片碎碎點綴，用黎呃like一流，不過影左幾張相雪糕已經開始「流汗」，要快啲食先得。先試試淨雪糕，質地超重冰感，比霜淇淋冰感更重，但奶味超濃郁，而且香甜，唔錯，再試雪糕加檸檬皮，味道幾清新幾得意，不過其實個人覺得唔加都得。再試試混合左奶茶嘅雪糕，超好味，即使雪糕奶味濃郁，仍然食到好分明嘅茶味，食一啖就好似飲左啖香濃奶茶咁，身為港式奶茶控嘅我非常滿意。不過個雪糕真係好快溶，我地一直喺希慎入面食，無離開過冷氣地方，食到最後竟然有1/3杯奶茶飲，不過溶左之後飲好似仲好味。個人黎講比較喜歡creamy 啲嘅雪糕，如果雪糕用返多啲奶黎整應該會更加好食!另外，就係價錢比起其他銅鑼灣出名嘅雪糕店黎講都算貴，不過勝在佢都幾多味揀，pop up store完結之前會再黎試其他味!