阿里山台式美人鍋 (Closed)

年晚好忙，今日終於抽到少少時間，就約老友去打邊爐聚舊。因為老友喺佐敦工作，原本諗住隨便喺佐敦搵一間食肆打邊爐就算，點知剛巧經過呢間食肆，見呢間火煱店嘅湯底幾特別，又做特價，就決定試吓。火煱店係樓上鋪，中式裝修，座位寬敞，坐落好舒服，好適合一班朋友嚟食飯打邊爐。湯底有好多款可以揀，都幾特別㗎，最後我哋揀咗個酸菜白肉鍋湯底。我見其他食客個火鍋湯底好大份，而且我又唔係咁肚餓，所以就隨便叫幾樣配料試吓。酸菜白肉鍋個鍋好大個，材料好豐富，除咗有粟米，蕃茄、酸菜、肉片、粉條外，仲有一碟酒香五花腩跟埋上桌。湯底酸香撲鼻，非常開胃，未放其他配料落火鍋之前，最好先舀一碗靚湯試吓，包你食慾大開。安格斯雪花肥牛脂肪分佈均勻，只輕輕一灼，嫩滑非常，充滿肉香。日本扇貝扇貝好大隻，肉厚，洗得好乾淨，食得放心。手打五寶丸拼盤有豬肉丸、牛丸、蝦丸、墨魚丸、鯪魚丸， 由於手打關係，非常彈牙。 當中我覺得墨丸、蝦丸最彈牙，但猪肉丸有啲散，牛丸則牛味甚濃。什錦蔬菜籃蔬菜最緊要係新鮮，每款少少，唔會淨食一款咁悶。食完呢餐，印象最深刻嘅係個湯底， 好味又開胃，埋單時侍應話呢度仲有私房菜食，叫我哋下次嚟試吓。