雲香園小鍋米線

Open Now

Now Closed

朋友私心推介嘅隱世米線小店，呢日喺尖沙咀行街經過，見唔算多人，終於有機會試吓。小店地方唔算大，但座位算闊落，冷氣好夠，啱晒食熱辣辣嘅米線呀。朋友話呢間嘅湯底係新鮮熬煮6小時，湯底特別入味。餐牌有十多款米線選擇，亦有多款特式小食及飲品。雲香園米線（$65）- 第一次嚟食，揀咗佢嘅招牌菜，入面嘅配料可以話包羅萬有：台灣腸、雞翼、雞絲、魚肉春卷、螺旋菜、韭菜、芽菜、冬菇、酸菜及腐皮等。唔食辣嘅朋友可以揀清湯或酸辣走辣湯底，食得辣嘅朋友可以點有辣度嘅，味道更加豐富。要讚下佢嘅米線，入口滑溜好味，配料質素非常高，尤其係魚肉春卷同雞翼都好好味。牛腩小窩米線（$50）- 分量都算多，牛腩同牛筋炆得好入味，配咗酸辣走辣湯底，提升咗牛腩及米線味道，真心不錯。醬伴皮蛋（$27）- 流心皮蛋，配以微辣嘅醬料，味道好多層次。呢個作為小食嚟講，份量算係非常多。我哋簡單點咗杯檸檬菜蜜及柑橘蜜，味道都唔錯。鍾意飲奶茶嘅朋友可以試吓佢嘅奶茶，據聞係由老板親身學沖，而每杯奶茶都溝咗幾款茶葉沖製以成，係正式茶餐廳嘅奶茶。