日暮家 麵匠 (Closed)

今日試咗葡式檸檬蜆貝拉麵。佢個湯底好清爽，就算飲哂啲湯都唔會覺得膩。檸檬嘅清新香味同酸味，令到你就算係熱到溶嘅天氣，都會忍唔住飲哂啲熱辣辣嘅湯。啲蜆好嫩，檸檬嘅微酸能夠提起蜆肉嘅鮮甜。加埋洋蔥，味道同口感都更有層次更豐富。麵底我揀咗硬身，因為本身就鍾意食啲爽身有咬口嘅麵。下次再去，軟硬度試下普通，睇下會有啲咩唔同。如果本身唔愛檸檬入饌，又或者本身唔愛有啲酸嘅菜式，我都建議叫嚟試一次，或者呢個拉麵會令你改觀。服務方面，店員非常有禮友善，安排入座、落單亦見效率。環境方面，全店雖然只有24個位，但坐落絕對唔會覺得好壓迫，食嘢食得都幾舒服。