南豐小廚雞煲火鍋 (Closed)

之前同事吹雞嚟食宵夜，就對個黃酒雞念念不忘，經openrice訂枱，個雞煲有半價，真係非常之抵食。黃酒雞，濃郁既湯底，一打開已經聞到酒香同藥材香，份全雞好乾淨企理，小店處理食材好好，店員亦都幫手落雞及話你知煮幾耐，雞肉唔會老，有誠意細心-加分！個湯張相係浸完全部雞先影，所以全部都係雞油，但淥其他食材落去又唔係好覺。鯪魚球必食！鯪魚球加在檸檬葉，好清香好夾，彈牙夠味好食。另外幾款手打丸類上次都食過，樣樣都唔錯，水準以上安格斯牛肉二百幾蚊碟，雖然都係雪藏牛小排，亦都可以，但如果你係牛魔王對牛肉好有要求，呢款就滿足唔到你，建議試其他種類牛肉。有牛坑腩，見到隔離枱嗌左份，一定要試試！其他配料，雲吞，魚皮餃，魚腐，豬膶等等，全部都幾好。酸薑皮蛋普普通通，嗌嚟飲啤酒送下口都幾過癮，大甜大酸。果杯巨無霸檸檬茶真係解渴之選總括食材ok，價錢合理，小炒炸物椒鹽等等都水準之上。推介！！唯一挑剔就係個場比較舊。