自家製韓國刀削麵 (駱克道)

Open Now

Now Closed

之前在尖沙咀返工諗過去食lunch，但係超勁多人一直無去試，依家發現灣仔有分店，依家灣仔放工就一於去試下。一入門口就係韓國人招呼，但唔洗驚，因為係電話落單，同埋入面有員工係香港人黎。入去坐低就會獲得泡菜一小碟，個人覺得個泡菜幾好味，又唔會好辣，岩岩好。由於晏晝超多人，所以都對佢抱有期望。期望愈大失望愈大，因為餐廳名係自家制韓國刀削麵，所以覺得麵一定係正野。叫左個花蛤刀削麵，無期望既咁好食，味道唔差，但又唔係話超好味。個麵條既質地有少少似辛辣麵再煙韌少少，粗過辛辣麵咁，都唔錯既，個湯有紫菜蛋絲都幾好，個花蛤就無menu咁多，好細粒，無咩特別。另外叫左個雙拼餃子，個人覺得係必食！超大粒，最正係咬落去啖啖肉又juicy豬肉餃同泡菜餃，個人比較中意豬肉餃，食過會想再食。而泡菜餃就覺得個辣油可以重手左少少。最後仲叫左個五花肉泡菜煎餅，見到泡菜煎餅真係忍唔到口，煎得脆脆口，又唔算熱氣，真心推介，會想繼續食呀。總結：麵就無咩特別，餃子好好味，煎餅都好好味，下次再黎食過。