新嚐泰泰國餐廳

Open Now

Now Closed

今日honey帶我去試好味泰國菜 ，原來喺石水渠街樓上鋪有一間地道嘅泰國餐廳， 味道好不單止，仲好實惠 。我哋試咗幾個菜都非常滿意，其中最滿意嘅就係咖哩豬肉配薄餅， 薄餅係現叫現做， 酥香鬆軟， 係我試過最好食嘅薄餅，我哋食完一份， 意猶未盡 ，再叫多一份， 用來點咖哩汁，絕配。 食泰國菜點少得冬陰功湯 ，我哋都鍾意食蝦 ，叫咗個大頭蝦冬陰功湯， 兩隻蝦有手板咁長，好多肉，鮮味爽甜， 湯入面仲有好多菇 ，車厘茄 ，檸檬香葉， 煮得濃香，小小辣， 特別惹味， 好快又畀我哋掃清。 再來一份無骨海南雞， 皮薄肉滑 ，加上特製嘅酸辣汁， 用嚟點海南雞 ，雞味濃郁，食到舐舐脷。 有肉就一定要有菜， 叫咗碟泰式炒椰菜苗， 炒得好好味，不過椰菜苗好似成熟咗啲。 食到最後好似唔夠喉，又叫咗一個蒜蓉包， 有四大塊 ，烘得熱辣辣，加蒜蓉醬 ，香脆美味。 估唔到我哋兩個人可以食咁多嘢， 餐廳嘅牆上畫滿曬泰國風情畫， 牆上嘅人喺度食， 我哋又喺度不停咁食 ，鬥食得多， 個畫面都幾搞笑開心。 喺度食飯好舒服 ，地方闊落 ，隔離左右啲人都食得好斯文好安靜 ，全部都係有修養嘅食客。