COBALT

Open Now

Now Closed

朋友以前係呢頭返工，同佢重遊舊地行下酒吧街，意外發現呢間新店，食物出色、餐酒好岩我口味，居然不過係一般西餐嘅價位，未食完已經話想再黎。芝麻吞拿魚沙律作為套餐嘅前菜，無論份量同擺盤都好唔錯。 沙律菜新鮮爽脆，幼嫩嘅吞拿魚厚切，滿滿咁用黑白芝麻包裹，口感豐富，魚味同芝麻香都好突出。蝦多士就咁望個名仲以為係普通嘅炸蝦膠多士，嚟到好似蝦湯咁真係嚇親，但竟然係全晚最有驚喜。 蒜辣椒橄欖油嘅煮法雖然聽落同平時嘅tapas差唔多，但完全唔油膩，反而好似熬左個好濃郁嘅蝦湯咁，蒜片同香料好香，大蝦新鮮彈牙，同朋友一致認同會為左佢再黎。南瓜薑湯講真個薑字我有少少卻步，食落真係有好明顯嘅薑粒，但估唔到真係好夾，薑只有香味而唔會太辣，令到平時得個甜字嘅南瓜湯更加有層次。三文魚柳煎得好香，雖然好厚但仲保持到嫩滑有肉汁，底下仲有脆脆嘅魚皮好香口。 番紅花意大利飯夠晒濕潤Creamy，我食到係有啲薑黃粉味，味道溫和都容易接受，仲有啲雜菌同瓜好有咬口。我最期待嘅開心果雪糕冇令我失望，開心果味超濃，亦都冇乜果仁皮嘅苦味，濃厚幼滑creamy，值得一試。