Fun Fun 串串鍋 (Closed)

見網上介紹呢間Fun fun串串鍋午市放題唔使100蚊，咁抵即刻book位黎試下。十二點鐘上到黎餐廳，見已經排晒隊，仲個個係熟客，咁即係好野黎啦。一坐低就落左湯底先，叫左麻辣鍋併壽喜燒，鴛鴦湯底要另加25蚊，都合理呀。麻辣湯底略微不太辣，bb辣度容易接受嘅。壽喜燒幾好，仲有唔少配料送添。自助bar拎的火鍋料，款式不算多，各類蔬菜，丸類，餃子，午餐肉等。落單點的牛肉芫荽卷同牛肉泡椒卷都好好味。落單點的肥牛都幾好。最正係有芫荽拎呀，長蟹棒都正啊。諗緊呢個球狀物係咩黎，原來係魷魚。仲有牛筋，粉腸等，拎黎打邊爐又幾得意喎。雖然啲肥牛望落麻麻，淥起上黎都幾好呀，唔鞋口亦唔算太肥啦。飲品有罐裝茶，鴻福堂樽裝，韓式罐裝等，啤酒則要另加錢。呢個芝麻同花生味嘅麻吉燒攞黎打邊爐好得意，其實即係湯丸，個鹹鹹甜甜咁幾好味。甜品有豆腐花仲有杯裝雪糕同牛奶雪條，都係任食㗎。埋單約一百蚊人頭，的確係好抵嘅價，任飲任食喎，淨係唔洗洗碗都正啦，哈哈。