Hustle Guy (Closed)

之前幫襯過荃灣店嘅到會，覺得水準好高好滿意，所以唔夠一個月就同朋友再試下荔枝角呢間分店啦～是日4個人，叫左：甲羅燒蟹肉Pizza，波士頓龍蝦Pizza, 羊架，慢煮牛胸柳, 白酒蒜片辣鮮蜆扁意粉，仲叫左幾杯特飲。Pizza：兩個都好好味同足料，係薄Pizza黎嘅所以唔會話好飽～羊架：份量好足，有4件，好夠淋，如果佢可以再熟多少少可能會再香口啲，不過整體黎講都好滿意……配菜我地揀左配薯條，熱辣辣好好食！仲可以點松露醬添！牛胸柳：因為之前食到會覺得佢地嘅牛勁好食，所以今次滿懷期待，反而有啲失望。其實味道ok嘅，不過煮得over左少少，靭左啲……白酒蒜片辣鮮蜆扁意粉：驚喜之作，估唔到咁好食喎！蜆肉好多，意粉有少少辣，食落好香口呀～我同朋友都爭住食至於特飲就係正常發揮嘅，不過呢度好似冇酒類～值得一提是晚樓面得一個年輕侍應，佢仲要兼埋水吧～ 不過呢個侍應哥哥非常抵讚，全晚笑笑口亦都有問必答，好親切好Nice! 最後埋單每人都係200蚊多啲，食到飽飽咁走，CP值好高！總括而言，呢間係一間好好嘅良心💛店，有機會一定會再去！