羅麥記 (V City) (Closed)

今時今日懷舊裝修同食物已經唔算咩賣點，同類食肆已經有唔少。一定要食物質素，選擇同價錢都合理，先至有吸引力。 羅麥記裝修不俗，墊枱張康樂棋紙真係後生啲都可能唔知係乜。 衞生同環境就冇“懷舊”，尚算乾淨唔太迫。 食物款式有特色得嚟都幾好食。磚頭焗豬扒飯，豬扒鬆軟，茄汁味道不俗，個麵包先係靈魂，索晒汁，食落香軟，好食過啲飯！ 羅麥汁雞翼撈麵，個汁冇正宗瑞士汁咁香濃，不過用嚟撈麵味道就啱啱好，太濃嘅話就會好鹹。雖然個撈麵食落略嫌黏口。美祿甜麵包，其實只不過係奶醬多加美祿粉，略為調節賣相就好似甜品仲可以賣貴啲，真“聰明”。 紅豆冰奶茶，整體上一般茶記貨色，不過有兩粒内有紅豆嘅冰就幾得意，雖然其實整體味道同口感似乎冇因為呢兩粒冰改變… 喺今時今日當唔少食肆嘅食物悶到爆或者得個樣嘅時候，羅麥記總算取得個不俗嘅平衡。希望可以保持水準吧!