天然豚骨拉麵專門店一蘭

Open Now

Now Closed

好耐冇食過一蘭啦，之前都係喺銅鑼灣店食，估唔到旺角都開咗分店，我自己叫咗天然豚骨拉麵加兩隻半熟鹽味蛋👍🏻，佢嘅豬骨湯底都係一樣有水準，但係由於本人唔係咁鍾意食太濃味嘅湯底，所以湯底方面，我都係選擇咗清淡，感覺會平衡好多。男朋友第一次食一蘭，覺得還可以，因為佢本身唔太鍾意食日本拉麵，原因係好油膩，湯底太濃，食完一蘭就覺得都係有少少濃味，佢試完我果碗湯底，覺得清淡啲嘅口感比較舒服，所以佢表示下次嚟食的話都係會選擇清淡。食完拉麵當然要食一蘭嘅特濃抹茶布甸，我同朋友嚟食，每次都覺得好好食，濃郁嘅抹茶加上厚實棉密嘅布甸，口感不俗😋，不過如果唔係咁鍾意食甜嘢嘅朋友，可能都會好似我男朋友咁覺得麻麻哋，因為佢嘅抹茶焦糖味都幾重，所以唔鍾意重焦糖味嘅朋友可能要小心選擇～環境一如既往舒適，服務態度好，冇乜特別可以挑剔，男朋友今次仲大贊男廁廁所乾淨、舒適、寬敞，最緊要係有三排紙巾供客人使用，表示好貼心。不過如果一欄可以增加多少少款式就好啦，幾年前到而家款式都係不變，雖然味道依然保持水準，但係略嫌唔夠多元化，如果可以隨季節增加不同款式或者小食都唔錯～