鴻星中菜 (Closed)

未講味道，先說服務，眼見入座率得六七成，都唔知點解侍應這麼散慢，叫極都冇乜反應，唉！！真係未食已一肚氣。今日叫了九款食品，埋單約百九元，價錢尚算合理，但整體味道唔太好，而且服務真係要改善一吓。素菜包，外皮唔鬆軟又韌，餡料味道一般。葱花炸兩，粉皮唔滑溜，油炸鬼唔香脆，味道嘛嘛。炒米粉，配菜唔多，味道偏鹹又太油。叉燒湯河，叉燒嚡口，河粉唔滑，味道唔太好。排骨鳳爪煲仔飯，排骨偏肥，肉質腍滑，米飯較乾，但味道剛好，唔加豉油都可以。燻蹄湯檬粉，燻蹄真係太嚡口，湯底同檬粉冇乜特別，味道普通。蛋白雙皮奶，質感唔滑，味道偏甜。鮑汁炆雞腳，炆得軟硬適中，但汁底過鹹。麻沙糍，即係雷沙湯丸，上枱時已凍，糯米皮有少少糊口，唔軟韌，芝麻餡唔香，得個甜字。