梓桐堂

Open Now

Now Closed

同事farewell，老細話「要帶你地食好嘢」，原來係帶我地去西灣河嘅「梓桐堂」。因為枱同枱之間有空間，唔會太嘈但又唔會靜得太拘謹。我推測菜單係一早老細同餐廳預訂，所以一人齊，就按步一款款上菜。先嚟嘅係前菜拼盤，五款前菜都好食，但我個人就最鐘意個一醉鮑魚。鮑魚肉嫩，酒味甘香入味，最後將剩低響杯入邊嘅花雕都飲埋！有前輩話個煎西班牙豬個汁醎，但可能我食得濃味，所以又唔覺。湯係花蛤海鮮清湯，哩個真係不得了。湯內嘅"湯料"係花蛤同帶子，肉質依然軟嫩唔會鞋哂，純粹海鮮味嘅湯非常清。主菜：特別鐘意個黑椒香煎大蝦同糖醋牛柳，牛柳微辣得黎有少少"喼汁"酸味；至於豆腐蒸班腩感覺有啲過油，而海鮮炒飯就普通，無咩特別，反而個上湯菜苗個湯又係好清甜。老細仲加餸(加多左兩嘅分量)...所以食到最後真係超飽。最後黎嘅甜品，三款最深印象嘅係巨峰提子糕，酸酸地無咁膩，食到咁飽啱啱去下油膩感。其餘兩樣都係想像得到嘅味道，所以都係覺得無咩特別。其實話就話好似好多嘢都無咩特別，不過只係因為我估到佢係咩味，唔係好大驚喜；但整體黎講係好食嘅。不過我老細食後就覺得，無以前咁好食喎。