都市樂

Open Now

Now Closed

好耐冇過嚟紅磡呢邊，今日就同朋友嚟呢邊食韓國嘢都市樂。餐牌嘅嘢食都好吸引，我哋落單之後店員就送上六小碟，有香腸翠玉瓜、醬油薯仔、泡菜、芽菜、菠菜、甜番薯。我最鍾意佢嘅泡菜，味道同其他泡菜有少少唔同，比較甜。另外甜番薯脆脆地，都好食。所以我哋叫店員添咗呢兩款，食到好滿足。Rosé忌廉辣炒年糕好有驚喜，甜甜地唔算太辣，年糕好煙靭，個蛋係糖心蛋，真係好好食。炙熱醬油雞肉配飯啲雞熱辣辣，香得來唔會太鹹，用嚟送飯真係一流。本身想嗌炸紫菜，但係賣晒，所以揀咗韓式香炸雞球。炸雞啱啱炸起，熱辣辣脆卜卜，食到停唔到口。嘢飲嗌咗糖漬檸檬伯爵冰茶，飲落好清爽，用嚟送辣嘢好夾。朋友要咗檸檬氣泡咖啡，話估唔到咖啡同檸檬咁夾，飲完好消滯。