Wings Cafe & Bistro

Open Now

Now Closed

有訂台所以唔洗等，餐廳地方寬闊，乾淨企理，裝修都好靚。侍應都好有禮貌，亦都好主動去幫忙，唔洗叫自己見到咩幫到都會幫。 整體嚟講用餐體驗都好好。至於食物，叫左個晚市套餐，餐湯係南瓜湯。好鍾意南瓜同忌廉個比例，啱啱好，食到南瓜味但係未到好出，唔太鍾意南瓜嘅朋友都可以試下。個口感都好好，唔太稀，係個幾好嘅西湯嚟。之後主菜叫左兩個，極厚切牛頸脊同埋龍蝦汁意大利飯。牛頸脊都算有驚喜。本身有味道淡口，係食肉味同埋煎嘅香味。食食下想食多啲味就可以點佢個阿根廷青醬，好配個牛。但係唯一唔好就係煎得有少少唔均勻，有啲熟啲有啲生啲。另外個蒜頭都幾好食，聽講工序好多，又煎又蒸又焗。好香好好食。薯蓉配搭蘑菇，再加啲肉汁好夾，呢個菜非常好食。個龍蝦汁意大利飯就差咁啲，啲海鮮就正常啦，量都唔少，個飯後感都幾好，食落唔覺得好滯。但係佢酒味太重，蓋過哂啲龍蝦汁味。唔會話唔好食但係下次會試其他野。嘢飲叫左呢個朱古力牛奶，幾滿意，上黎嗰陣個色好靚。味道就偏牛奶多啲，視乎個人口味。我自己就幾鍾意飲。焦糖布甸加配焦糖脆脆雪糕，值得講嘅係佢雪糕個溫度啱啱好，唔係好硬好難不，但係又唔係好淋就嚟溶咁。味道都好有層次，唔會太甜，幾好食