Circle M (Closed)

今日工作關係約咗人傾嘢，原先諗住去嗰幾間樓上 cafe 都因為疫情而唔做堂食，結果臨急臨忙搵到 Circle M，一試之下，估唔到好有驚喜喎😃。叫咗 lunch set 嘅招牌卡邦尼意大利粉，餐湯係南瓜湯，兩樣嘢嘅水準都非常唔錯：個湯雖然冇乜南瓜茸，但就好鮮甜，一向唔鍾意南瓜嘅我都覺得幾正；卡邦尼意粉叫得做招牌，果然有啲料到，醬汁夠杰身，芝士同蛋黃味夠濃郁，真心好食👍。除咗食物質素唔錯之外，呢度嘅擺設同裝飾都好吸睛，例如七彩繽紛嘅馬賽克玻璃座地燈，牆身掛住嘅魚缸同懷舊黑膠唱片等等，都非常靚非常有心思，坐喺度飲杯嘢，傾下偈，或者睇陣書，其實相當舒服。臨走前，同店員哥哥傾咗陣，我話今日坐咗三個幾鐘，計埋我成間店都剩係得三名顧客，真心戥佢哋驚🥺，佢話疫情關係，都冇辦法，好彩平日生意都算 ok，仲話遲啲出面平台整埋 BBQ，希望到時會多啲生意。好，之後一定會再嚟。