生記飯店 (Moved) New Location

今晚一行七人生日飯，揀咗灣仔生記。咁多年來，呢度都係保持傳統粤式酒樓格局，簡簡單單，企企理理。每次生日飯局，都係放盡去叫，大擦一餐。嚟呢度指定菜式一定叫鹽焗雞、生炒骨、薑蔥豬膶。鹽焗雞原隻上，外皮焗得帶點脆，雞肉乾身咗少少，唔夠鹹香嫩滑。生炒骨就保持一貫水準，甜甜酸酸好味道。薑葱炒豬膶最出色，豬膶爽滑不嚡口，一上枱，即被秒殺，同枱人連薑葱都唔放過，可想而知有幾滋味。酥炸筒蠔熱辣辣登場，炸漿厚薄適中，不過味道就寡咗少少。豉汁蒸魚雲好惹味，同白飯係最佳配搭。上湯竹笙浸豆苖，普普通通，不過不失。豉油王炒麵有水準，出色之作。泥鯭粥夠鲜味，粥底綿膩，不俗。飯後甜品仲奉送一大碟白糖糕，清甜中帶一點酸，完全係兒時的味道，童年回憶返晒嚟。