鴻星中菜 (羅氏商業廣場) (Closed)

今晚老細請食🧧開年飯，例牌嚟呢間鴻星因爲覺得服務好喔😝！第一道菜梗係發財好市，發菜都夠我地每人一小撮食攞個👍🏻好意頭，蠔鼓都好大隻；之前嘅酥炸蟹鉗🦀真係炸得好酥脆，一咬個炸皮就散晒，每個人都食得好論盡，不過蟹味🦀就真係食唔到喇；再嚟就係冬菇瑤柱燴花膠，冬菇好軟身好入味，花膠就好有咬口；跟住就係清蒸龍躉🐟，條魚真係蒸得啱啱好，啲肉好嫩滑；終於嚟到我最愛😍嘅西芹合桃炒帶子，今次啲帶子冇咩鮮味，反而合桃炒完都好脆口加返啲分；最後當然上甜品紅棗糕，呢道菜已經好少係酒樓見到，或者係我唔留意，每次食都覺得佢嚟得太遲，因為佢唔太甜亦好重紅棗味，好軟身但唔黏口，不過食到最後只可以勉勉強強食到一件咋😭！