蘇媽.蘇媽馬來西亞茶餐室 (Closed)

同平時一樣都係食我最鍾意嘅下午茶今次就嗌咗三份餐第一份就係多士小食下午茶我揀咗拼三串沙嗲小食加杯馬來西亞拉茶佢嘅咖央多相當之好食，上下兩層嘅麵包比佢哋烘到相當之鬆脆，脆到直頭好似搵油炸過咁樣，配搭埋入面甜甜地嘅咖央醬，絕對唔會輸蝕比香港嘅奶油多。至於串燒方面佢嘅沙嗲醬真係相當之好食，好食到我直頭問咗阿姐一句有冇得就咁買個醬拎走，佢同平時一般界外買嘅唔同，可以食得出佢用嘅配料相當豐富，令到個層次好複雜。第二份就係雞翼蛋淮山麵喺呢度可以同大家講雞翼絕對唔係主角，佢個淮山麵相當之彈牙，唔會好淋，配合埋個佢個蝦湯底，每一啖都好似食緊蝦頭，每一啖都有蝦嘅精華喺度第三份就係最基本嘅百吉爹肉骨茶 - 三層肉食過咁多間肉骨茶呢一間始終係最出色最出色嘅一間。唔單止茶味香濃，有藥膳嘅感覺。單單係佢嘅汁已經可以送到幾碗飯。呢度仲要有個好處可以俾你無限添飲。而佢每一舊肉都相當之入味，但又唔會煮得太老、太硬。雖然未去到入口即化嘅感覺，但以佢嘅味道來講已經係相當之出色。