上海婆婆 (新都城中心) (Closed)

上海婆婆主打固然係上海菜，亦係呢個商場可以話係唯一一間上海菜館，難怪好多時候都要等位。但等位並唔代表質素一定好，呢幾年食過幾次，發覺水準係隨住年月而一直下降....生煎鍋貼 3隻($28) 外皮明顯地係好厚身，不過豬肉份量幾多而且入面有好多湯汁，算唔錯既。酸辣湯麵 ($42) 麵條唔彈牙，剪得較碎，酸辣湯都可以既，較稠身，有菇類同荀絲等材料，味道當然係做到酸酸地同少少辣既感覺啦。擔擔麵($42)確係差，湯底雖然有花生同麻醬但可能落得太少，味道係好淡。麵條質素亦係差，毫無咬口而且剪得太碎。排骨($28) 質素好差，咬落去凍既，一啲都唔脆口。肉質無左應有質感，太腍，味道又鹹左啲，太失望。小籠包($30)，全店最正常既食物。皮算薄，入面豬肉餡同湯汁加埋幾鮮甜。炒鱔糊($68) 炒得較油身，鱔唔腥不過較乾身，份量較少。整體而言上海婆婆環境幾舒適既，但食物質素其實本身只屬一般，不過而家仲要一路下降中，我諗管理層要注重一下點樣提升食物質素。