回家湘

Open Now

Now Closed

國內人氣湘菜餐廳於今年抵達香港，西環同佐敦都有分店，以住家媽媽味道為主打，提供多款正宗湘菜菜式，開胃前菜、健康時蔬、營養燉湯、家常小菜、特色主食等，堅持新鮮健康、傳統工藝、鮮配現做，價格親民，大件夾抵食。老長沙臭豆腐，賣相特別，適合打卡，一上枱就聞到臭臭嘅香氣，外層脆身，內裏帶咬口，醬汁唔辣，值得一試。外婆炒蛋份量十足，唔知落咗幾多隻蛋去炒，食極都仲有，飽到上心口，鹹香口味，配飯一流，性價比甚高。本身以為米豆腐係真豆腐，原來係用大米浸咗之後加水磨成米漿，加工後形成豆腐狀，口感好得意，不過比較膩，建議多人嚟食先好叫。飽讀之選有長沙醬油炒飯，炒至乾身，搭配粒粒配料增添口感，估唔到味道幾清淡，而且散發著淡淡香氣，搭配其他小炒一齊食更加夾。菜嘅款式都唔少，要咗自己最鍾意嘅乾煸四季豆同手撕包菜，相對嚟計兩款比其他嘅更油，不過勝在味道香濃惹味，唔鍾意食菜嘅朋友仔實食得到，值得一提嘅係辣到可以自由選擇，大人小朋友都啱食！見上面包場搞緊生日會，睇嚟下次要帶多啲Friend一齊嚟試吓其他菜式先～