陳儀興玫瑰餐廳

Open Now

Now Closed

呢幾日天氣涼返少少，即刻好想去打邊爐。見到新蒲崗呢間鋪頭有好多款唔同嘅煲揀，吸引左我嘅注意。雖然係平日晚上，但餐廳都好旺場。驚蔘鐵棍雞（半隻）呢款新煲連餐牌都未有顯示，即刻嗌黎試下。湯底已經配有芹菜、紅棗、杞子。兩個人嗌左半隻雞，有淮山、海蔘伴碟，同時都有少量紅棗、杞子、蓮子，亦附送一份生菜。落左雞肉之後，大火滾熟就熄火焗幾分鐘。首先，梗係要飲碗湯先，好鮮甜同時帶有少少藥材味。然後再食雞，雞肉大大件，肉質嫩滑，完全唔會韌同柴。而海蔘口感亦十分爽實。招牌手切肥牛（細)手切牛新鮮，油脂分佈平均，每一塊都睇到雪花紋，淥一淥就食得，十分重牛味。鬼馬墨魚膠(8件）將墨魚膠釀入油炸鬼入面，都係第一次見。一開始以爲淥完會淋曬，點知完全唔會，仲有少少口感，同理索曬啲湯，好好味。而且墨魚膠彈牙爽口，配埋油炸鬼，呢個配搭出乎意料地好味。新鮮黑柏葉黑柏葉十分新鮮，比白柏葉更能保留原味同口感，淥完都唔會韌，保持爽脆嘅口感。脆鯇魚腩肉質新鮮，結實爽脆。飲品除左汽水同自家製涼茶外，仲有平時茶餐廳嘅飲品。嗌左兩杯檸檬茶，黎到嘅時候嚇親，好驚喜，好大杯啊！整體而言，食物質素十分高，係十分滿足嘅一餐。