豐鍋雞煲 (荔枝角道) (Closed)

好似好耐冇食過雞煲，原本諗住搭巴士去第二度食㗎啦，點知喺巴士站見到呢間雞煲好似唔錯，所以就食埋先走。我哋兩個人叫咗半隻招牌bb辣雞煲，佢啲雞都好滑，而且都好多舊係啖啖肉，味道方面都唔錯，夠晒入味又夠晒麻，絕對值得再返嚟食。食完雞煲一定要打邊爐，打邊爐就一定唔少得食牛肉，我哋揀咗個安格斯牛小排，一拎上嚟已經見到佢啲花紋好靚。淥完都仍然見到佢啲油脂分怖好平均，好香牛味又夠晒林，堅正。之後我哋叫咗一個手工四寶丸，分別係墨汁墨魚丸，墨魚丸，蝦丸同埋鯪魚丸。其中我覺得佢個墨汁墨魚丸幾好食，因為咬開仲有粒粒墨魚肉，夠晒彈牙。原來我哋見到佢有一個幾特別嘅係爆芝紫菜響鈴，首先佢係新鮮滾熱辣即叫即炸，所以絕對係脆卜卜。而佢中間除咗包左紫菜之外仲有芝士，呢樣野都幾特別，啱晒啲芝士迷。食完咁多油膩野梗係要食返啲菜，等自己內心好過啲，所以我哋揀咗油麥菜，佢啲菜都幾新鮮，可以索下油。嘢飲方面朋友就叫咗杯鹹檸七，我自己就試咗佢哋嘅玫瑰柚子。不過佢哋個玫瑰柚子真係太甜，都唔係好飲到玫瑰或者柚子味，所以都係飲返可樂會好啲。