林記小食

Open Now

Now Closed

今晚釣墨魚收獲真係麻麻，無可能食得飽。落左船去酒吧安頓好就即刻去搵食，依條巷仔好多好野食喎 ﹗生滾粥、糯米飯、泰式串燒燒烤、腸粉、燒賣、雞髀、咖喱魚丸、等等。排排吓隊又有個女人打尖，又要我發火叫佢排隊，係咪您自己攞黎衰 ﹗係要肉鬼酸比人鬧先得 ﹗又係大陸婆 ﹗我企係 uncle 個檔口諗左好耐好耐，買唔買黎試吓呢，好香喎，夏天食臘味飯，HKD22 得好少乍。有潤腸臘腸各半條、臘鴨三塊、花生蔥花同豉油囉。好好食，糯米飯乾身嚥韌，撈埋豉油同蔥一齊食，熱辣辣好正呀 ﹗無投訴，係份量少啲囉。好多野想食，為免食唔晒，所以揀左串辣魚蛋、生腸。生腸入味又爽口，唔會過咸，好食。魚蛋係真魚蛋喎，口感結實魚味濃，但我叫辣魚蛋喎，無辣味既？本來有叫豉油雞髀架，但阿姐話慢慢有排都未熟，要浸好耐呀 ﹗咁算啦，今次放過您，唔要喇。混醬腸粉，辣醬、甜醬、麻醬、芝麻、豉油撞埋一齊 ﹗本身無咩特別，但個腸粉堅滑喎，食開街邊既都比較粗糙同挺身，最正係佢秘製麻醬，好香又好好味。