頂好海鮮酒家

Open Now

Now Closed

秋風起心思思想食羊腩煲，朋友推介我去呢間老牌酒樓，話啲羊腩用料新鮮好靚，其他小菜都唔錯。上星期帶咗屋企人去食飯，佢哋都讚好食。雙冬羊腩煲羊腩食得出係新鮮羊肉，好淋好入味，肥瘦適中，個汁好濃洧，配料有荀、冬菇、枝竹、馬蹄，全部都入晒味，撈飯一流。我哋仲加左日本油揚同埋唐生菜，索汁好好味。椒鹽鮮魷炸得好好，炸粉薄薄，外層酥脆，鮮魷厚肉，鮮嫩爽口。山賊醬牛肋排呢個醬好惹味，有洋蔥甜甜嘅味道，仲有黑椒香味，重點係牛肋排燉到好淋好鬆化，入曬味，厚肉啖啖肉好正。燒鵝雙拼呢度嘅燒味都幾好，燒鵝上庄唔會太肥，皮好甘香，肉唔會乾。叉燒唔好睇佢個樣普通，但係肉質好淋，一啲都唔乾嚡。老火煲例湯木瓜魚尾煲豬展夠晒火喉，飲得出真係老火湯，真材實料。最後仲送左陳皮紅豆沙，糖水都唔馬虎，紅豆大大粒，起晒沙，又唔太甜，好正。