OMG Chicken (Closed)

今日嚟咗將軍澳南食飯，見到呢間炸雞餐廳諗都冇諗就入咗去食，由於太肚餓，所以就叫咗二人餐。一開始好快就送咗個海鮮拼盤，本身以為呢間餐廳主打雞，海鮮拼盤會冇咁高質，點知質素超乎意料之外，好有心思，以前菜嚟講份量好有誠意，而且擺盤亦好有心思，每件海鮮都放得好靚，啱哂聖誕節同男女朋友一齊食。 蒜蓉包整得好好，啱啱焗起熱辣辣，而且焗得好酥脆，不過如果蒜蓉味可以再重啲，感覺應該會更加正。 終於到招牌菜OMG烤雞，而呢個烤雞亦不負招牌菜之名，燒得好好，肉質保持細嫰，而且肉汁鎖哂喺皮下面，一咬落去肉汁爆哂出嚟，好正。 食肉獸pizza底薄薄哋，焗得好香脆，不過最特別唔係個餅底，而係pizza上面既肉！餅底上面真係好多肉，即使係再大食既朋友，相信都一定夠食，食落好滿足。