樂天皇朝 (Closed)

一早聽聞樂天皇朝的八色小籠包非常出名，但我始終鍾情原味小籠包，所以點了一籠原味，一籠蟹粉小籠包。因為我同老公都好鍾意食煎炸野和點心，所以點左好多小食，反而無點主食。原味小籠包：皮薄餡靚，入口多汁，夾起都唔會爆。而且餡料嘅豬肉一啲都唔肥，啱晒怕肥豬肉嘅老公。蟹粉小籠包：蟹粉好香濃，但係就奪去咗小籠包嘅鮮味，所以我都係鍾意原味小籠包多啲。無錫鮮肉鍋貼：熱辣辣剛煎起，個底煎得金黃香脆，咬落去肉汁湧出嚟，所以食嘅時候要小心燙口。炸饅頭：佢一上，我就即刻食咗兩個。炸饅頭外皮炸得金黃，而饅頭入邊都好鬆軟，點埋煉奶食，簡直係絕配。炸春卷：春卷都係即叫即炸，非常新鮮，嚟到嘅時候熱辣辣，差啲辣親個口。薑汁炒芥蘭：芥蘭青綠爽脆，加埋啲薑汁，但又唔會太油，不錯👍🏻清炒白菜：炒白菜好有鑊氣，不過都係薑汁芥蘭好味d.滋補薑茶湯圓：糖水好夠薑味，芝麻湯圓餡料都好幼滑香濃。樂天皇朝既小食整得唔錯，好有質素。下次會試埋小菜和主食。