麵屋一平安 (Closed)

每次行美麗華，都想試試哩間日本嘢，今日終於有機會試下。店鋪裝修得好似日本居酒屋，侍應都係外國人，好得意。日本蜜桃汁，會搭配埋冰塊一齊上，服務好好。熱生薑檸檬蜜，生薑味唔會好重，薑味透出淡淡蜜糖香味，唔錯。蔥花牛舌，牛舌火候掌握得唔錯，食落彈牙爽口唔會好韌。少少黑胡椒同海鹽調味，已經可以帶出牛舌鮮味。酥炸雞軟骨，即叫即整，送上來仲熱笠笠。雞軟骨面衣好薄，食落好脆口。燒明太子雞翼，雞皮烤得好香脆，內裡仲好juice。明太子鮮咸味道同雞肉好夾，唔洗落醬已經好夠味。特製熊本蒜油豬骨湯拉麵，配料勁豐富，有溏心蛋，叉燒，紫菜等。拉麵湯底好濃郁，飲得出落咗大量豬骨煲制，拉麵掛曬湯底味道，好食到停唔落口。日本和牛壽喜燒鍋，係期間限定菜品，必須試試。壽喜燒湯底係清甜果款，同蔬菜，豆腐都好夾。和牛會另上，仲會搭配埋日本蛋。和牛分量都幾多下，微微燙下可以食。如果覺得唔夠味，還可以點落塔塔醬一齊食，又係另一種風味。