保頓冰室

Open Now

Now Closed

今日去尖沙咀海港城shopping，晚飯決定離開商場出去搵嘢食，第一時間諗到亞士厘道嘅餐廳，經過一間「保頓冰室」懷舊嘅裝修被吸引著，餐廳地面鋪上一格格懷舊嘅瓷磚，一張張透明玻璃面嘅方形木枱，加上牆身貼上懷舊嘅海報，令你有時光倒流嘅感覺，以前嘅回憶返晒嚟，加上高質嘅食物，真係冇得輸。公司燴意粉用上冰室常用嘅材料，例如香腸，餐肉，火腿等等，跟意粉大兜亂，香濃嘅蕃茄醬汁將每一條意粉包着，口感一流，除此之外，意粉在鋪上煎蛋和漢堡扒，用料十足。椒鹽豬扒煎蛋豬油撈飯 出邊好少餐廳可以食到豬油撈飯，所以決定試吓。首先豬扒份量頗多，肉質嫩滑，椒鹽和辣椒嘅味道恰到好處。跟餐還奉上一支秘製醬豉油和一支豬油，芳香撲鼻嘅豬油加埋豉油跟白飯撈勻之後，將平平無奇嘅白飯昇華，令你食唔停口。紅豆冰椰汁和淡奶嘅份量剛好，跟紅豆攪勻之後，能帶出紅豆嘅鮮甜，唔係咁多間餐廳可以調校出咁高嘅水準。