潮牛莊火鍋

Open Now

Now Closed

呢間位於尖沙咀金馬倫廣場嘅潮式火鍋店主打手切騸牯牛肉，有好多牛嘅唔同部位可以食到，我哋嗌咗職員推介的爪邊，建議煮5-8秒就食得，另外仲點咗坑腩爪同金錢牛展，每款都有寫明要灼幾秒。爪邊果然幾好食，口感煙靭，最鍾意嘅係坑腩爪，見到肉嘅色澤都幾新鮮，入口嫩滑，點埋醬汁就更開胃。湯底方面揀咗養生烏雞湯，入面真係超足料，包括有黨參、杞子、圓肉、北芪、紅棗同烏雞，滋補得來又鮮甜，打邊爐之前忍唔住先飲咗兩碗湯先。最後仲點咗份手工韭菜餃同五寶丸拼盤10粒！可以一次過試晒手打牛丸、蝦丸、墨魚丸、梅菜豬肉丸同陳皮鯪魚丸，我最鍾意墨魚丸夠晒彈牙，另外陳皮鯪魚丸都幾特別。