魔膳廚房 (Closed)

近APM而唔洗搭𨋢、唔洗點等位、價錢合理又好味嘅餐廳，都無乜幾間。呢間嘢地方夠大，坐位寬鬆，招呼夠好，嘢食又唔差，所以連午餐都要嚟幫襯吓！每次嚟到，最鍾意佢個熱辣辣面包，鬆軟又夠香，加埋個成日轉嘅湯，餓到傻都即刻比佢征服。今日試咗個冬陰公海鮮意粉，冬陰公未夠泰式咁正宗，但都夠香、夠味，意粉軟硬度適中又唔乾，唔錯。另外叫咗個豬扒意粉，肉唔硬夠淋，保持水準。上菜速度都好快，唔會等到天荒地老至有得食。跟餐飲品同平時散叫一樣咁大杯同抵飲，咖啡仲係即磨，唔會因爲午餐變咗細杯或者將貨就價。埋單速度都好快，啱曬我哋食飽要返公司交人嘅打工仔。