韓台站 (Closed)

今日經開馬鞍山耀安邨，見到新開左一間韓式餐廳，見到個門面同內裏裝修都幾光鮮，所以就膽粗粗入左去試吓。今次就叫左韓式雞肉石鍋飯同埋蜜糖芥茉炸雞塊。韓式雞肉石鍋飯 : 份量超級大碗，食極都好似食唔完個飯咁，食完果時個石鍋重好熱辣辣，而味道就同其他餐廳 d 味差唔多無咩大分別，不過佢跟飯有個辣醬俾你，鍾意食辣嘅朋友就啱晒，因為個醬都真係幾辣吓。蜜糖芥茉炸雞塊 : 比我預期中大碟，如果以 $32 蚊黎講真係好抵食，大大件又多醬，而雞塊亦都炸得幾脆口吓，雞肉都算滑，不過唯一可惜的是個蜜糖芥茉醬，只是普通芥茉無咩特別驚喜。