好川好菜 (Closed)

同家人聚餐當然要揀返一間裝修靚嘢食又正嘅餐廳，今次嚟到尖沙咀嘅好川好菜，地理位置都好方便，一出地鐵站其實1分鐘都會到到，而且裝修可以講係古色古香，店家用左深咖啡色同紅色作為餐廳嘅主調，而且侍應們都着上紅色嘅制服食物方面首先都叫咗個粉皮，味到都幾出色，前菜來講都可以叫做係必食。主菜方面叫咗一個水煮牛肉，牛肉嘅肉片好高質，絕對唔係一啲平價嘅肥牛，有種入口即溶嘅感覺，配上紅薯粉，真係超級好食。之後我哋叫咗一個熏鴨，呢個菜真係好好食，鴨皮被保留着一啲脆脆地嘅感覺，而且皮下脂肪唔多，忍唔住食多幾啖去配飯。仲有就係辣椒炒鯇魚條，真係辣得好過癮，而且份量十足。最後就係一定要試吓佢個川式魚香茄子，真係相當有驚喜，而且個味道係絕對出面食唔到，除咗保留本身魚香茄子嘅鹹香，仲加咗川式味道，辣味同鹹味配合出一個特別嘅味道，一定要試吓。