竹串日本料理 (Closed)

喺金鐘呢個地方大大話話返咗差不多一年工，有咩好食唔好食都試過，成日都去出去遠啲既地方探吓險。最威水最遠都係去吓灣仔，咁啱有個同事話不如坐地鐵去再遠少少，咁就變咗膽粗粗一齊坐地鐵去銅鑼灣搵食啦。一坐低我哋怕食唔切就快速點餐，分別點咗極上魚生飯及極上鰻魚丼飯。侍應點完餐就馬上送上熱茶，沙律同小食。等咗唔洗十分鐘，我哋個主食就到啦，佢呢度嘢食如果只能用一個字黎形容，一定係用個［巨］字。極上魚生飯－以佢呢個價錢，佢真係CP值好高，佢既刺身全部都勁厚切，啖啖肉得黎又新鮮，朋友話好欣賞佢嗰隻勁大牡丹蝦同帶子。極上鰻魚丼－一上菜時真係嘩一聲，個賣相真係超巨大，係一整片鰻魚免切！忍唔住即刻同朋友打卡相機食先呃like。面頭既鰻魚燒汁同鰻魚都好香噴噴，未食之前仲喺度諗咁大舊一定食唔晒，最後係食得晒，因為真係好香熱辣辣，不經不覺就食晒佢啦。😅食完我哋就馬上埋單走人趕返公司，侍應勁好人拎住兩粒雪米糍追出黎比我哋話係我哋既甜品。總括黎講，佢呢度既LUNCH SET都真係幾抵食。有機會可以再坐地鐵過黎食。🤣