美心香港地 (Closed)

馬鞍山中心附近的茶餐廳特別多。只要你肚餓想食野，梗有一間喺你左近。行開新港城，見到呢間香港地冇人等位就去試試。拎左飛都要等30個冧把先到，好彩啲人食得快走得快，等左10分鐘左右就有位坐。早餐既選擇都算多，有港式有西式。今次就揀左西式食。一上菜，賣相果然同茶餐廳差唔多，當然味道亦相近。值得一提的就係佢個餐包，上嗰陣又熱又脆，正！奶茶用上茶餐廳常用既黑白淡奶，算是接近茶餐廳水平。除左食物，香港地服務亦都算唔錯，員工都幾積極詢問食客既需要，又快手快腳，服務態度比起普通茶餐廳要好唔少。而且環境都企理、坐既空間都夠大，雖然係走茶餐廳路線，但服務同環境絕對係高質素。