泰廚泰國菜館

Open Now

Now Closed

夜晚上完堂後join朋友食泰國菜，入到去勁多人，朋友又揹住支結他，勁唔想搭枱……但唔搭枱要等半個鐘先有枱，我哋3個都好肚餓，唯有搭枱啦……我飲過咁多間泰式餐廳嘅龍眼冰，暫時最好飲係哩間，味道唔會太甜，清清哋，好舒服。木瓜沙律同粉絲沙律就無乜特別，但哩兩款沙律都只係$1碟！勁抵！因為每滿$200可以以$1叫指定4款食物嘅其中一款！我哋本來係想叫生蝦，但賣晒。食親泰國菜必食椰菜苗，無其他原因，情義結來，同馬拉盞一齊炒真係好好味！菠蘿炒飯雖然我哋哩碟唔同其他客人一樣，原隻菠蘿上，但都無因為咁而味道差咗，仍然好好味，飯每粒都入味，上面勁多肉鬆，而且配合埋菠蘿嘅酸甜味，好開胃，食晒成碟都唔係問題。小食拼盤要咗大嘅，點知真係好大碟……食唔晒……拼盤有雞同豬串燒，春卷，炸蟹鉗等等，都係一啲比較香口嘅小食，但如果你唔係大胃王的話，叫細就夠。青咖哩雞，雞肉係用雞柳，咖哩完全唔辣，但有咖哩香味。有咖哩就梗係要配薄餅！薄餅奶油味好重！我勁鍾意！不過如果再整得鬆化啲就仲好味！3個人食咁多嘢，埋單都係4百幾蚊，都算抵。