Beerliner German Bar & Restaurant (Closed)

話說我之前都試過喺Beerliner食晏，嗰次見到餐牌上有款香腸拼盤就已經想叫，不過最後冇叫到，今次就有機會了。餐廳一如以往都係咁抵食。首先嚟咗份沙律，沙律菜基本上都算係新鮮，芝士味道亦到板，夠豐富。另外仲有啲烘到脆卜卜嘅麵包粒，相當唔錯。(今日)餐湯係南瓜湯配塊小多士，南瓜湯唔算好濃郁，但南瓜味都夠嘅，同埋有少少南瓜絲都幾好。多士夠脆口，味道OK，冇乜特別。德式香腸拼盤睇落唔大份，但食完都好飽肚。香腸超級Juicy，熱辣辣，每啖都爆唒啲汁出嚟。整個拼盤，尤其係帶微辣嗰款特別好味。除此之外，燒薯都唔錯，薯味十足。最有驚喜嘅係酸椰菜，酸酸地，超級開胃，完美地平衡整個拼盤。