Video
Read full review
2014-03-31
13286 views
好耐無黎食喇，咁都訂到我最喜歡張枱，係最入既一張，遠離酒吧同入口，夠靜又坐得舒服。今晚天氣非常好，維港夜景盡收眼底，真係好靚 ﹗一陣仲可以睇埋維港既幻彩詠香江添呢。 今晚八人飯局，諗左好耐決定叫個六人餐再散叫幾碟小菜啦，因為個六人餐有南海一號既招牌菜金榜大蝦同貴妃湯飯囉 ﹗最低消費每位 HKD500，所以仲有空間叫多幾個送。炸蝦片，似薯片囉，味道一般。燒腩仔，不過不失，合格。肥瘦適中，肉質軟墊帶咸香，幾好味 ﹗層皮都脆既，但口感假左啲，一咬就碎，似係翻煎或翻燒過，青葵陳醋雲耳，有陣清香青葵味好醒神。雲耳爽口，辣辣地又酸酸地好開胃。南海 XO 醬鴨舌，一直都以為係麻辣鴨舌，所以感到奇怪點解半點麻辣味道都無呢？原來只係辣 XO 醬，味道只屬微辣，鴨舌肉質滑溜又彈牙，滷水入味帶點清香，好味呢 ﹗椒鹽龍鬚，椒鹽？依個真係無味喎，又食唔到魷魚味，可唔可以比個喼汁我點呢？口感就幾好既，外層鬆脆，魷魚鬚嚥嚥靭靭。燉響螺雞湯，超級香濃呀 ﹗好味到不得了 ﹗未放上枱，響螺味已經撲面而黎喇 ﹗飲落又膠又濃，熱辣辣大啖大啖咁飲，實在停不了 ﹗但每人只得一碗乍 ﹗金榜大蝦，招牌名菜，一定要食 ﹗自家得奬金榜汁
肉架喎 ﹗攞黎煲湯、炒飯、整生菜包都好麻。片皮鴨，南海係皮連肉一齊片架，片完都唔見得有幾多乍喎，不過每人都應該可以分到兩至三件既。由樓面姐姐負責片，我硬係覺得唔係由廚師操刀點都差?囉 ﹗食落鴨肉鴨皮還可以啦，味道唔係特別出眾，而且肉汁欠奉，所以有點 dry dry 地。不過大致上都滿意既，用薄餅卷住兩片鴨加青瓜條再加海鮮醬同吃，都十分冶味 ﹗好滿足。上湯浸腐竹銀杏涼瓜，唔知涼瓜係咩品種呢，從未見過可以片到咁薄，最初都估唔到係咩黎架，要放到入口先知係涼瓜乍。味道帶甘而不苦，令人越食越想食，夠晒諗又索夠上浸，好食。炸乳鴿，炸得金黃香脆，米芝連即係米芝連。肉嫩汁多，香氣撲鼻 ﹗不油又不膩，一舊未食完已經想食第二舊喇 ﹗我當然唔客氣啦，哈哈。個個都唔食頭唔食頸，咁又益左我喇 ﹗一野咬落個鴿腦度，裡面濕潤軟棉而甘香，其實鴿腦味道同質感跟鵝肝差不多啫。龍蝦湯泡貴妃飯，又一味招牌名菜，限量每人一碗架乍 ﹗米係炸過架喎，口感似米通卜卜脆好過癮 ﹗龍蝦湯香而不濁，清得黎帶點忌廉味道。燈影煎堆，同事見到隔離有煎堆，自己又想食囉。無問題，齊齊試試啦。即叫即炸熱辣辣，外層舖滿芝麻，十分香脆，咬落嚥嚥??，口感一流 ﹗但係味道偏淡，再甜少少會好味啲。蝦片、燒腩仔、陳醋雲耳、椒鹽龍鬚、南海 XO 醬鴨舌、天麻魚皇、龍蝦湯泡貴妃飯、美極煎黑豚、水煮特級肥牛、上湯腐竹浸涼瓜、金榜煮大蝦、片版鴨、燈影煎堆 ﹗我地都唔係食好多野啫 ﹗
Post
